إذا ما لبست كندورة بو كلفس، ومشيتها لين إملحّت، وقلبتها يوم بهت لونها· إذا ما لعبت حافي في السكة القايلة، ودقيت باب الجيران وركضت· إذا ما شربت ميرندا باردة، أو كريم صودا مثلجة قبل الغداء، أو أكلت عسكريم فيمتو بو حطبة قضاب برقع· إذا ما جرّيت عمامة باتاني، وشردت، وهو يربع وراءك· إذا ما غافلت راعي الدكان، وسرقت من الغرشة حلاوة ''حليب بو بقر''· إذا ما انهزبت قبل المغرب عشان يسبحونك عن الغبرة· إذا ما بغمت العشاء، وهم يجحلونك بصراي أو بأثمد· إذا ما دربحت تواير ودرامات، ولعبت بالطوّاق، واستأجرت سيكل بالساعة· إذا ما حلّ بك برد المريعي، وتعقطت، وتميت تشخط ذاك السنسول على إيدك· إذا ما ما مشيت في سكيك النخيل وأنت تناغج، تريد تسمع صوتك من الخوف· إذا ما لطمك على وجهك راعي العيالة، وأنت تلقط ''جيّل'' في الأعراس· إذا ما كنت تجلب الظبة، وتطف من المكحمة، وتراقي هالنخيل· إذا ما لعبت في الصنيّة، ونبّشت الكدافة، وركضت وراء فوزة الماي· إذا ما هرجت الماء يوم كويل الجن يهب، ومسوي زوبعة· إذا ما ضربك خاز باز وما قصّر، وخلاك من اليهد تتعصّر· إذا ما جاءك بو شاق، وشربوك من غسول الفناجين المحلط· إذا ما غززت من السح حتى احمرّيت، وامتعدت من الحلوى، وتريقت عيش بايت من السحور أيام رمضان· إذا ما تمردغت في المراغة مع جلاب الحارة الضالة· إذا ما ركضت وراء حمار شهري، وإلا مَصْرِي يعري· إذا ما سافرت إلى المرج أو العالي ببروة من الحاكم· إذا ما اتشنترت عن الحصبة واليدري، بإبرة كانوا يحمّونها على الجولة· إذا ما ضربك الحفاء والشحف، ودهنوك بملبد الشعر الأخضر· إذا ما تسبحت في الشريعة، وهببت وزارك، ورقدت تحت اللومية في الصيف· إذا ما فرقت شعرك على الجنب، وحطيت عليه حل ناريل، ولبست نعال جبلي منكصة، وتعطرت بعطر بو طيرة· إذا ما تفالعت مع عيال الحارة بالحصا تحت السدرة· إذا ما اداغشت مع عيال الجيران، لأنهم تخطوا حدودك، وداسوا على الخط اللي رسمته على الأرض· إذا ما سألت عن يوم ولادتك، وسمعتهم يقولون: سنة الدبى أو سنة الرمادة، أو يوم عمّ اليدري، وسألت عن المكان وقالوا لك: في الدرس، أو تحت النخلة أو في الزوية أو عدال الحضار· إذا ما شفطت من مدواخ أبوك أو تنشقت من نشوق جدك لين احمرت عيونك ودار رأسك· إذا ما انغسلت لين لاعت جبدك على حفظ جزو عم· إذا ما حزّموك بحابول، وركيت النخل، ويدّيت مع أهلك ذاك القيض، وجنزت وياهم السح· إذا ما أخذت خميسية المطوع، وقمت وخرّيتها في دكان حسون· إذا ما استلمت الشرهة من يد بن سليّم، وركبت على طابوقتين علشان يزيدونك، وبصمت بابهامك· إذا لم تكن من هؤلاء الذين أعددتهم، فأنت مواطن، ولكن ليس بشغل سنة سكتو!