واحد يشتكي أنه جدد سيارة للتو، ودفع كل مخالفاتها التي توازي راتب شغالته لمدة عام، وبدت أوراقها بيضاء، خالية من المادة 24، وخالية من النقاط السوداء، ولم يلحق أن يفرح بسيارته الخفيفة من كل التبعات، حتى تفاجأ بتحرير مخالفة من نوع”مواقف”، والسبب غير واضح، إلا إشارة أنه متوقف في موقف يشترط أن لا يتوقف فيه، لا موقف معاقين، ولا فوهة حريق، ولا موقف خاص لمدير البنك، فيعرف، موقف من هالمواقف الكثيرة على الكورنيش، والمجانية بعد الساعة التاسعة، ثم نظر لسيارته ربما متوقفة على الخط، فوجدها المسكينة في مكانها الآمن، وخشمها عند الخط الأزرق والأبيض، نظر للمخالفة، فوجد أن وقت المعاينة 1.14 دقيقة ليلاً، وأبو دراجة “راشنّه” بالمخالفة في 1.17 دقيقة، والناس هاجعة، حتى أنه “ما واحى له يعاين” طيب يمكن “الريال” يهرول على الكورنيش، يمكن يسحب من البنك، يمكن “بادّتنه حايه”، صاح من ضيق، وقال: “في الصيف ما يعرفون كيف يكدّون، ولا شقايل يظهرون هالفلوس، فيطيحون بهالناس اللي مب مسافرة، يمرطون منهم كل ليلة خمسمية”!
واحد يقول: “شفت راعي الدراجة اللي يحوط على ريل وحده تلايا الليل، وناوي صوب سيارتي، وجان أختّ له، ويوم شفته يعابل مكينته الصغيرة اللي في يديه، جان أدغشه بعليباه، وحلفت عليه يمين أني ما أفجه لين يخلي مكينته تفلح المخالفة، وعنك ودونك، والشيمه ودخيلك، وأنا أهوس عليه، قصورني أعد مفاصل رقبته، والله وسامحني وطاحت الحيّه، ولا سدني، من الغيظ اللي فيّ، أعنبوكم شو تبون تخالفون الناس في الليل، صيف، وحر، والمواقف خالية، والناس أركود، ولا الصريخ، وأنتم تحاوثون الأماكن، تلقطون هالخمسميه من هنا وهناك، وأقوم وألتفت له وأقول له: تراني أنا ساري المنطقة الغربية، وأه ها تحطون لي رادار في الطريق، فصرخ نحن ما إلنا دخل بالرادار، ما أعرف يخصكم ما يخصكم، تراني أقول لك: والله لأردلكم من هناك”!
أنسة ظلت تريوس بسيارتها، وتحايس عشان تدخل الموقف، وقدام، ووراء، مرة تضك يمين زيادة، ومرات يسار، المهم بعد العثرة وقفت في الموقف واستراحت بعد أن شعرت بحرارة التعرق، الحين خلها تظهر من الباب جان تقدر، وحايلت عمرها، وظهرت بشق الأنفس، غابت قليلاً، ورجعت، وشافت ورقة خفيفة على زجاج سيارتها، فوضعت يدها على فمها، وهي تكاد تقول: “وأيه نسيت.. أوو..”، وتلفتت يمنة ويسرة، فبدأ الندم عليها، الحين خلها تدخل سيارتها، وتعصرت، ولايمت عمرها، ويالله.. يالله، ودخلت بضيق وشدة، وصاح نقالها، وتوترت، وضربت بباب السيارة بقوة، ويمكن لكشت السيارة اللي جنبها، وهذاك سيرها، وأعتقد كانت تسب وايد!


amood8@yahoo.com