البنات اللي يتبطرن على عجائز الوطر الأوّلي، ويشوفن عمارهن عليهن، ولو ودهن يتبرأن منهن.. نقول: الحق مب عليهن، الحق على أم خمّاس! - البنات شغل هذا الوقت الرديء، واللي يحطّن في شنطهن مدواخاً وتعميره، أقول: الحق مب عليهن، الحق على أم خمّاس، ما عرفت تربيّ! - الشباب الذي كل اهتمامه بالسيارات، وأنواع الهواتف، وأشياء الحياة السهلة، وغياب الوعي، نقول: الحق مب عليهم، الحق على أم خمّاس اللي ربّت ثور وما يَزَرّ! - البنات اللي يرضفن المكياج على المكياج، ويحطن الفودر اللي أفتح من الوجه بثلاث درجات، حتى يصبحن باهتات، والجفون ملونة أخضر وأزرق، مثل الوحرة، نقول: الحق مب عليهن، الحق على أم خمّاس، ما تولتهن بسوط أخضر! - الشباب الناعم اللي نشوفه ما يقهر، ويعلج لبان، وما قاصر إلا يمشي مع خواته، ولا يبالي بسواد الوجه، نقول: الحق مب عليهم، الحق على أم خمّاس، ما زهبت الميسم قبل ما يطر شارب الواحد منهم! - البنات اللي يسون أبراج عالية فوق رؤوسهن، ويتبخترن في مشيتهن بكعوبهن العالية، ولا يشوفن أحد عدالهن، ولا أحد يقدر يقول لهن روفّن بعماركن من هالخكة، على شو كل هذا الزيف، أقول: الحق مب عليهن، الحق على أم خمّاس ما قمّطت، ولا شدّت البطان! - الشباب اللي يستهتر بكل شيء، ويشوف عمره فوق الناس، يمكن يضايق أباً يمشي مع بناته، ويمكن يسد على سيارات الناس، ولا يهمه أحد، ولا شيء، ويمكن يوسخ مدينته، نقول: الحق مب عليه، الحق على أم خمّاس، ما حمّرت عليهم العين! - الشباب من الجنسين اللي يظهرون الكلمات السوقية في حديثهم، والحديث الماصخ فيما بينهم، ويسمعونه للناس في الأماكن العامة عيني عينك، حتى تخر جفونهم من الخجل، وكأن الأمر عادي، نقول: والله ما ورثتوا هذا الشيء من أهلكم، ولا من اللي كانوا قبلكم، ما تخرج العيبة منهم، لكن مثل ما قالوا: الحق مب عليكم، الحق على أم خمّاس، ما جربت وياكم جرن الفلفل الأحمر، لين تتهامل عيونكم، ويصبح لسانكم مثل الجمرة! - الشباب من الجنسين اللي يزعجون أذن المدينة بأغانيهم التافهة والرخيصة، ويصرون أن يسمعونها الناس غصباً عنهم، ويسرقون من حرية الناس مثلما تلقاهم يدخنون بالسرقة في مكان يغشاه الكبير والصغير أو يعيثون فساداً وماء ودخاناً وكتابة في الحمامات العامة، نقول: الحق مب عليهم، الحق على أم خمّاس يوم ضربت ما كسرت ضلعاً، ويوم تولتهم ما رامت تسلّم منهم بس العين! ناصر الظاهري | amood8@yahoo.com